गएको बुधबार, बिहीबार र शुक्रबार अवैधानिक रुपमा युरोप प्रवेश गर्न चाहने आप्रवासी चढेको डुंगा डुब्दा धेरै मानिसको ज्यान गएको युएनएचसिआरले जनाएको छ । 

इटालीको दक्षिणी क्षेत्रमा पर्ने लिबियाको तटमा अफ्रिका हुँदै आएका आप्रवासी चढेका डुंगा डुबेका हुन् । ग्रिसले आप्रवासी आउने मार्ग रोकेपछि अहिले इटाली हुँदै लिबियाको मार्ग आप्रवासीले प्रयोग गर्ने गरेका छन् । बुधबार डुंगा डुब्दा हराएका झण्डै एक सय जना अझै बेपत्ता रहेको युएनएचसिआरकी प्रवक्ता कारलोट सामीले बताउनुभयो । 

यस्तै बिहीबार बिहान लिबियाको साब्राथा तटमा डुबेका पाँच सय ५० जना भन्दा धेरै अझै हराइरहेको उहाँले बताउनुभयो । शुक्रबार भएको अर्को डुंगा दुर्घटनामा परेका एक सय ३५ जनाको उद्दार गरिएको तथा ४५ जनाको शव भेटिएको युएनएचसिचारले जनाएको छ ।