‘नीति, नेतृत्व र निर्णय फेर्न पाइन्छ तर नटेर्न पाइँदैन्’
नेपाल कम्युनिष्ट पार्टीका संस्थापक महासचिव पुष्पलालले पार्टीभित्र गुटबन्दी सबैभन्दा ठूलो अपराध हो भन्नुभएको छ । तसर्थ कसैलेपनि गुटबन्दी हुने क्रियाकलाप गर्नुहुँदैन् । आफू अनुकुल भए ठिक अरुको भए बेठिक भन्ने मानसिकता कसैले पाल्नुहुँदैन् । नीति, नेतृत्व र निर्णय फेर्न पाइन्छ तर नटेर्न पाइँदैन् ।
इतिहास साँची छ नेकपा एमालेको लोकप्रियता सगरमाथाको चुचुरोमा पुगिरहेको बेलामा २०५४ सालमा पार्टीभित्रका विवादहरुलाई सहि ढंगबाट व्यवस्थापन गर्न नसक्दा पार्टी विभाजन भयो । त्यो विभाजनले नेपालीजनताको आशा भरोसालाई निराशामा बदल्ने काम गर्यो । यदि त्यो बेला एमाले विभाजन नभएको भए आज मुलुक विकास र समृद्धिको उचाईमा पुगिसक्थ्यो । यो खालको परिस्थितीबाट गुज्रिन पर्थेन् ।
हिजो पार्टी विभाजनको बेलामा नेकपा एमालेले मालेलाई र मालेले एमालेलाई (एक अर्कालाई) यति धेरै आरोप प्रत्यारोप लगाउने काम भयो कि जून कुराको समयक्रममा कुनै अर्थ रहेन् ।
अहिले पनि नेकपा एमालेको नेतृत्वमा यो सरकारले राष्ट्रिय स्वाधिनता, राष्ट्रिय अखण्डताको पक्ष र वैदशिक हस्तक्षेपविरुद्धमा जूनखालको अडान लियो र समृद्ध नेपाल निर्माण गर्नको निम्ति जून योजना र दृष्टिकोण ल्याएको छ जसले विकास र समृद्ध नेपाल निर्माण गर्नको लागि सम्पूर्ण नेपाली जनतालाई यो दिशामा अगाडि बढाउन सफलभएको छ । यो बेलामा आरोप प्रत्यारोप एकले अर्काेलाई लगाउनु फगत पिशाबको न्यानो लिन खोज्नु मात्रै हो ।
२१ औं शताब्दीका कार्यकर्ता तथा जनता धेरै सजक र सचेत छन् । सबै नेताहरुको प्रतिबिम्बित क्रियाकलाप नजिकबाट नियालिरहेका छन् । को खर काट्ने र को खर डढाउने राम्रोसँग छुट्याउन सक्दछन् । तसर्थ यस्ता क्रियाकलाप नगर्न युवा संघ नेपालका तर्फबाट सबैलाई अनुरोेध गर्दछु ।
भाई फुटे गवार लुटे भन्ने कुरा २०५४ सालको विभाजनले स्पष्ट पारेको छ । अझ देशी विदेशी प्रतिक्रियावादी शक्ति र तिनका पृष्ठपोषण नेपालका कतिपय राजनीतिक पार्टीहरुले न्वारानको बल लगाउँदा पनि एमालेलाई कमजोर बनाउने नसकिरहेको यो परिस्थितीमा आफै भित्रको अर्थहिन विवादले एमालेलाई कमजोर बनायो भने भोली नेपाली जनता र नेपाल राष्ट्रले हामीलाई माफ गर्नेछैन् ।
एउटा भनाई छ– सत्रुहरुसँग लड्न म आफै काफी छु तर, मेरा मित्रहरुसँग मलाई बचाइदेउ भन्ने अवस्था एमालेको आन्तरिक पार्टी पंक्तिमा नआओस । जुन गोरुको सिंग छैन् उसको नाम तिखे भनेजस्तै गुटबन्दी गर्दिन गर्दिन भन्दै गुटगत काम, क्रियाकलाप र गतिविधिमा रम्ने र गुटगत गतिविधि र कामलाई पार्टीको काम ठान्ने काम पनि कुनै नेता कार्यकर्ताले नगरौं ।
ध्वस्त गर्न जति सजिलो छ निर्माण गर्न त्यो भन्दा हजारौं गुणा कठिन छ । विवाद गर्न र आरोप प्रत्यारोप गर्न जति सजिलो छ सबैलाई मिलाएर र लिएर हिड्न त्यो भन्दा धेरै कठिन काम छ । जसले कठिन काम गर्न सक्छ त्यो नै इतिहासमा असल राज नेताको रुपमा युगौं युगसम्म जनताको मन मष्तिस्कमा रहिरहन्छ ।
भावनामा नवहकिऔं । वर्तमान समस्यालाई जुधेर नयाँ नेपाल निर्माणमा सबै एमालेका नेता कार्यकर्ता जुटौं । आजको समयको प्रमुख आवश्यकता एमालेभित्रको खदिलो भावनात्मक एकता ।
0 comments
प्रतिक्रिया दिनुहोस्...